कक्षा १२ को नतिजामाथि उठेका प्रश्न छानबिन गर्न समिति गठन, शिक्षामन्त्री पोखरेलको स्पष्टोक्ति

 कक्षा १२ को नतिजा प्रक्रियामाथि प्रश्न उठेपछि सरकारले उत्तरपुस्तिकाको नमुना परीक्षण (स्याम्पलिङ) तथा परीक्षाङ्क र डेटा इन्ट्रीको पुनः प्रमाणीकरणका लागि समिति गठन गरेको छ।

शिक्षामन्त्री सस्मित पोखरेलले राष्ट्रिय परीक्षा बोर्डको नतिजा प्रक्रियाबारे सामाजिक सञ्जालमा भइरहेका टिप्पणी र विद्यार्थीमाथि लक्षित नकारात्मक प्रतिक्रियाप्रति मन्त्रालयको ध्यानाकर्षण भएको बताएका छन्।

उनका अनुसार गठन गरिएको समितिमा शिक्षा तथा खेलकुद मन्त्रालयका उपसचिव र पाठ्यक्रम विकास केन्द्रका उपसचिवसहित सम्बन्धित निकायका प्रतिनिधिहरू रहनेछन्। समितिले उत्तरपुस्तिकाको स्याम्पलिङ परीक्षण, प्राप्ताङ्क र डेटा इन्ट्री प्रक्रियाको भेरिफिकेसन गर्नेछ।

मन्त्री पोखरेलले परीक्षा बोर्डको नतिजा प्रणाली स्पष्ट र विश्वसनीय रहेको दाबी गर्दै आवश्यक जनशक्ति व्यवस्थापन गरेर तथा प्रशासनिक प्रक्रियालाई सहज बनाउँदै निर्धारित समयमै नतिजा सार्वजनिक गरिएको बताए। उनले नतिजा प्रकाशनमा कुनै हतार नगरिएको र नियमित प्रक्रियाअनुसार नै काम भएको स्पष्ट पारे।

यसैबीच, शान्तिपूर्ण रूपमा असन्तुष्टि जनाइरहेका विद्यार्थी वा समूहप्रति सामाजिक सञ्जालमा गालीगलौज, दुर्व्यवहार वा अपमानजनक अभिव्यक्ति नदिन पनि उनले आग्रह गरेका छन्।