मनसुनी र पश्चिमी वायुको प्रभाव, कोशी र बागमतीका पहाडी क्षेत्रमा वर्षाको सम्भावना

काठमाडौँ , असोज १६ - आज देशभर मनसुनी वायु र पश्चिमी वायुको आंशिक प्रभाव रहेको छ । जसका कारण देशभर आंशिक बदली रहेको छ भने बागमती प्रदेशको तराई भू–भागका एक–दुई स्थानमा हल्का वर्षा भएको जल तथा मौसम पूर्वानुमान महाशाखाले जनाएको छ । 

महाशाखाका अनुसार आज दिउँसो कोशी, बागमती र गण्डकी प्रदेशको हिमाली तथा पहाडी भू–भागमा साधारणतया बदली रहनेछ । लुम्बिनी, कर्णाली र सुदूरपश्चिम प्रदेशको हिमाली तथा पहाडी भू–भागमा तथा देशका तराई भू–भागमा आंशिक बदली रहनेछ । कोशी र बागमती प्रदेशको हिमाली तथा पहाडी भू–भागका थोरै स्थानमा मध्यमसम्मको वर्षा हुने सम्भावना छ । गण्डकी, लुम्बिनी, कर्णाली र सुदूरपश्चिम प्रदेशका पहाडी भू–भागका एक–दुई स्थानमा हल्का वर्षाको सम्भावना रहेको महाशाखाले जनाएको छ । यस्तै, कोशी, बागमती, गण्डकी र लुम्बिनी प्रदेशका तराई भू–भागका एक–दुई स्थानमा पनि हल्का वर्षाको सम्भावना छ ।राति कोशी, बागमती र गण्डकी प्रदेशको हिमाली तथा पहाडी भू–भागमा साधारणतया बदली रहनेछ भने लुम्बिनी, कर्णाली र सुदूरपश्चिम प्रदेशको हिमाली तथा पहाडी भू–भागमा आंशिक बदली रहनेछ । देशका तराई भू–भागमा आंशिक बदली रही बिहानपख हुस्सु लाग्ने सम्भावना रहेको महाशाखाले जनाएको छ । राति कोशी प्रदेशको हिमाली तथा पहाडी भू–भागका एक–दुई स्थानमा तथा बागमती र गण्डकी प्रदेशको पहाडी भू–भागका एक–दुई स्थानमा हल्का वर्षा तथा हिमपातको सम्भावना रहेको छ ।