बदालकोटमा तेस्रो बृहत् सांस्कृतिक तथा खुला खेलकुद प्रतियोगिता हुँदै
काठमाडौँ , असोज १८ - बदालकोट फुटबल क्लब (BFC), बदालकोट, कालिकोटको आयोजनामा ‘तेस्रो बदालकोट बृहत् सांस्कृतिक तथा खुला खेलकुद प्रतियोगिता–२०८३’ आयोजना हुने भएको छ। आयोजकले प्रतियोगितामार्फत युवालाई खेलकुदमा जोड्दै स्वास्थ्य, अनुशासन र स्थानीय प्रतिभाको पहिचान गर्ने उद्देश्य राखेको जनाएको छ।
प्रतियोगिताअन्तर्गत खुला फुटबल र खुला भलिबल प्रतियोगिता सञ्चालन हुनेछन्। खुला फुटबलतर्फ प्रथम हुने टोलीले रु. १ लाख ३५ हजारसहित ट्रफी, मेडल र प्रमाणपत्र प्राप्त गर्नेछ भने दोस्रो हुने टोलीले रु. ६६ हजार पुरस्कार पाउनेछ। फुटबलतर्फ प्रवेश शुल्क रु. ८,९९९ तोकिएको छ भने धरौटीबापत रु. १,००० राख्नुपर्ने आयोजकले जनाएको छ।
त्यस्तै, खुला भलिबलतर्फ प्रथम हुने टोलीले रु. ४० हजार र दोस्रो हुने टोलीले रु. २० हजार पुरस्कार प्राप्त गर्नेछन्। भलिबलतर्फ दर्ता शुल्क रु. ३,९९९ र धरौटी रु. २,००० तोकिएको छ। प्रतियोगिता खुला खसालिक नगर वडा स्तरीय भलिबल प्रतियोगिताका रूपमा सञ्चालन हुने उल्लेख छ।
फुटबलतर्फ उत्कृष्ट गोलकिपर, सर्वाधिक गोलकर्ता र सर्वोत्कृष्ट खेलाडीलाई जनही रु. २ हजारसहित ट्रफी प्रदान गरिने आयोजकले जनाएको छ।
आयोजकका अनुसार खेल सञ्चालन एन्फाका नियम तथा आयोजकको विशेष नियमावलीअनुसार हुनेछ। फुटबल टोलीमा बढीमा १२ जना खेलाडी र २ जना कोच/अफिसियल गरी कुल १४ जनासम्म सहभागी हुन पाउने व्यवस्था गरिएको छ। बराबरी भएको अवस्थामा निर्धारित नियमअनुसार सिधै पेनाल्टी सुटआउटमार्फत विजेता छनोट गरिनेछ।
आयोजकले खेलाडी तथा टोलीका लागि अनुशासनमा समेत कडाइ गर्ने जनाएको छ। नियम उल्लंघन गरेमा पहिलो कार्डका लागि रु. ५०० र रातो कार्डका लागि रु. १,००० जरिवाना लाग्ने उल्लेख छ। खेलविरुद्ध लिखित विरोध जनाउन रु. ४ हजार शुल्कसहित खेल सुरु हुनुअघि वा सकिएको १५ मिनेटभित्र निवेदन दिनुपर्नेछ।
प्रतियोगिताका लागि २०८३ साल कात्तिक २ गते बेलुका ४ बजेसम्म टोली दर्ता गर्न सकिनेछ। खेलहरू कात्तिक ९ देखि १२ गतेसम्म सञ्चालन हुनेछन्। प्रतियोगिताको उद्घाटन कात्तिक ९ गते बिहान १० बजे हुने आयोजकले जनाएको छ।
प्रतियोगिताको मुख्य उद्देश्य खेलकुदमार्फत युवालाई सक्रिय बनाउने, स्थानीय खेल प्रतिभालाई अवसर दिने तथा बदालकोटको सांस्कृतिक पहिचानलाई प्रवर्द्धन गर्ने रहेको आयोजकको प्रचार सामग्रीबाट देखिन्छ। प्रतियोगिता बदालकोट गाउँ, कालिकोटमा आयोजना हुनेछ।
लोकप्रिय खबर
लोड हुँदैछ...