कंगोमा एडीएफ विद्रोहीको आक्रमणमा ५० सर्वसाधारणको मृत्यु

प्रजातान्त्रिक गणतन्त्र कंगो (डिआरसी) को पूर्वी क्षेत्रमा एलाइड डेमोक्रेटिक फोर्सेस (एडीएफ) विद्रोही समूहले गरेको शृंखलावद्ध आक्रमणमा परी गत एक सातामा कम्तीमा ५० जना सर्वसाधारणको मृत्यु भएको छ ।

 स्थानीय सञ्चारमाध्यम तथा नागरिक समाजका प्रतिनिधिहरूले यसको पुष्टि गरेका हुन् । प्राप्त विवरणअनुसार विद्रोहीहरूले मुख्यतया उत्तर किवु र इतुरी प्रान्तका विभिन्न बस्तीहरूलाई लक्षित गरी छापा मार्ने, अपहरण, लुटपाट र आगजनी गर्ने जस्ता हिंसात्मक गतिविधि गरिरहेका छन् । गत आईतवार रातिदेखि विद्रोही समूहले इतुरी प्रान्तको मामबासा क्षेत्रअन्तर्गत पर्ने माकुमो र माबुओ गाउँमा आक्रमण गरी १५ जनाको हत्या गरेका छन् ।

 विद्रोहीहरूले स्थानीयका घरहरूमा आगजनी गर्नुका साथै केही स्थानीयलाई बेपत्ता पारेको नागरिक समाजले जनाएको छ । संयुक्त राष्ट्रसंघको समर्थन प्राप्त सञ्चारमाध्यम रेडियो ओकापीका अनुसार गत मार्च महिनादेखि मामबासा क्षेत्रका २० भन्दा बढी गाउँहरू एडीएफको निसानामा परेका छन् । यस अवधिमा मात्रै १३० भन्दा बढी मानिसको ज्यान गइसकेको तथ्याङ्क छ । कंगोस्थित संयुक्त राष्ट्रसंघीय शान्ति मिसनले शुक्रबार एक विज्ञप्ति जारी गर्दै उत्तर किवु र इतुरी प्रान्तमा सर्वसाधारणमाथि भइरहेका पछिल्ला आक्रमणहरूको कडा शब्दमा निन्दा गरेको छ । यद्यपि, कंगो सरकारले भने यी पछिल्ला हिंसात्मक घटनाका सम्बन्धमा हालसम्म कुनै आधिकारिक धारणा सार्वजनिक गरेको छैन । 

इस्लामिक स्टेट सेन्ट्रल अफ्रिका प्रोभिन्ससँग आवद्ध एडीएफ मूलतः युगान्डाको विद्रोही समूह हो । सन् २०२१ को नोभेम्बरदेखि कंगो र युगान्डाका सुरक्षा फौजले यो समूहलाई नियन्त्रण र निस्तेज पार्न संयुक्त सैन्य अभियान सञ्चालन गर्दै आएका छन् । तर सुरक्षा कारबाही जारी रहेकै अवस्थामा एडीएफले पूर्वी कंगोमा आफ्नो सक्रियता र प्रभाव क्षेत्र झन् विस्तार गरिरहेको स्थानीय पर्यवेक्षकहरूको ठहर छ ।